కవితాకన్యక గుణములు
కవికన్న రసజ్జుఁ డెఱుఁగుఁ గవి యే మెఱుఁగున్?
భువిలోఁ గన్యక గుణములు
ధవుఁ డెఱుఁగును గాక కన్నతండ్రేమెఱుఁగున్?
(శ్రీ దీపాల పిచ్చయ్య శాస్త్రి గారి ‘చాటుపద్య రత్నాకరము’ నుండి)
కవి మిత్రులారా, క్రింది సమస్యము పూరించండి.
ధవుఁ డెఱుఁగును గాక కన్నతండ్రేమెఱుఁగున్?
22 వ్యాఖ్యలు:
ఎవడెవ్విధి తా మారునొ
ఎవనికి తల వ్రాత జూడ నెటు లుండునొ; యా
స్తవనీయ జగత్పిత మా
ధవుఁ డెఱుఁగును గాక, కన్నతండ్రేమెఱుఁగున్?
భువనేశ్వరియౌ రమణిని
నవిరళమగుతన మనమున నాడెడి తలపుల్
శివుడను జగదీశు డుమా
ధవుఁ డెఱుఁగును గాక, కన్నతండ్రేమెఱుఁగున్?
శాస్త్రిగారూ, పద్యం అదిరింది సార్, వేదాంతం దించేశారు.
చంద్ర శేఖర్ గారూ! ధన్యవాదములు.
ఓ కన్నెపిల్ల స్వగతము:
రవికంచు పెరిగె రాత్రుల
సవడికిని నిదుర చెదరెను సవరిలు నాక
న్నెవయసు కలలు కుముదబాం
ధవుఁ డెఱుఁగును గాక; కన్నతండ్రేమెఱుఁగున్?
అవినీతి యుద్ధమందున
నవమన్మథ రూపు, నరుడి నందను జంపన్,
సవరించిన సైనము, సైం
ధవుడెరుగును గాక కన్న తండ్రేమెరుగున్.
ధవుడెఱుంగును కాని తండ్రియు,త ల్లెఱుంగనె లేదు లె
మ్ము, వర పుత్రుని కన్నకుంతియు ముద్దుకర్ణునినీటి లో
న విడలేకను; బాధ, వేదననంత మింగుచు, యా విచా
ర వదనమ్మునుఁ జూప జాలక రాకుమారి భరించెనే!
రుక్మిణి:
అవనీసురా!జనుమయా!
వివరింపుముతరుణిగతిని వేదనలేకన్
లవలేశమైన నను మా
ధవుడెరుగును గాక! కన్న తండ్రేమెరుగున్?
భువనైక బుధ్ధి , భుజ బల
నివహాంగుడు - రామకార్య నిర్వహణా సం
భవ మారుతిని భువన బాం
ధవుడెరుగును గాక కన్న తండ్రే మెరుగున్?
గోలి హనుమచ్ఛాస్త్రి గారూ,
చంద్రశేఖర్ గారన్నట్లు వేదాంతపరమైన మీ పూరణ బాగుంది. అభినందనలు.
*
మందాకిని గారూ,
మీ మొదటి పూరణ ఉత్తమంగా ఉంది. ఇక రెండవ పూరణగా సమస్యపాదాన్ని స్వల్పంగా మార్చి తరలవృత్తంగా వ్రాయడం ప్రశంసనీయం. అభినందనలు.
*
(మనతెలుగు) చంద్రశేఖర్ గారూ,
బాగుంది మీ పూరణ. ‘సవడి, సవరిలు’ శబ్దప్రయోగం అపూర్వం. అభినందనలు.
*
సైంధవుణ్ణి ఆశ్రయించిన మీ పూరణ బాగుంది. అభినందనలు.
‘సైనము’ ?
*
అజ్ఞాత గారూ,
ప్రశస్తంగా ఉంది మీ పూరణ. అభినందనలు.
*
లక్కాకుల వెంకట రాజారావు గారూ,
అత్యుత్తమంగా ఉంది మీ పూరణ. అభినందనలు.
గురువు గారూ,
అది సైన్యము.......... ( టైపాటు ).
ధన్యవాదములు.
గురువుగారూ, ధన్యవాదాలు.
తరల వృత్తాన్ని కూడా గుణదోషవిచారణ చేస్తారని ఆశించాను.
వారాంతపు సమస్యలో కూడా నేనూ, రవిగారూ పూరణలు కొత్త చేసి యున్నాము. దయచేసి పరిశీలించగలరు.
మీ ఆరోగ్యం ఇపుడు మెఱుగ్గా ఉందని భావిస్తూ.....
శివునిం గోరెద దీర్ఘా-
యువునని సుతుడన మృకండు డుద్విగ్నుండౌ,
నవు నాతని దీక్ష నుమా-
ధవుఁ డెఱుఁగును గాక కన్నతండ్రేమెఱుఁగున్?
ధృవు డయ్యెడ శ్రీహరికై
ప్రవిమల తప మాచరించి బడసెను కీర్తిన్
భువిఁ! బాలుని భక్తిని మా-
ధవుఁ డెఱుఁగును గాక కన్నతండ్రేమెఱుఁగున్?
' పవలున్ రేయియు సెల్లును
చెవినుంచును కూతు రేమి చెప్పు కొనెదరో! '
ఇవి నేటి తండ్రి మాటలు,
ధవుఁ డెఱుఁగును గాక కన్నతండ్రేమెఱుఁగున్?
మిస్సన్న గారూ,
మీ మూడు పూరణలూ ఉత్తమంగా ఉన్నాయి. అభినందనలు.
ధన్యవాదాలు, మాస్టారూ.
గురువుగారూ ధన్య వాదాలు.
శంకరార్యా ! ధన్యవాదములు.
అవినీతి దొరల సంగతి
కవిపుంగవుడేల యెఱుగు? కాలుడు యెఱుగున్ ,
సవినయ ప్రహ్లాదుని మా
ధవుఁ డెఱుఁగును గాక కన్నతండ్రేమెఱుఁగున్?
మంద పీతాంబర్ గారూ,
చక్కని పూరణ. అభినందనలు.
‘కాలుడు + ఎఱుగున్’ అన్నప్పుడు యడాగమం రాదు కదా! ‘కాలుఁ డెఱుంగున్’ అంటే సరి!
వ్యాఖ్యను పోస్ట్ చెయ్యండి